＊＊＊注意～文中不時有劇透～＊＊＊
《進擊的巨人》2013年出第一季真係好hit，連圈外人、好少睇劇既我（連game of thrones 都未開始睇）都有禁開黎睇下。一開始睇最印象深刻嘅情節係：Eren 媽掩住嘴咁講「唔好走」，同埋Eren 可以變身做巨人。前者話到俾全世界知呢套劇入面人物既寫實，可惜係後者令我興趣大減，「原來又係一套巨人vs巨人既熱血動畫」。第一季總括黎講係幾好睇：背景設定創新，容易令人聯想同代入現實既政治、經濟環境；人物有真實感，諗既野、做既決定唔會令我有駁故既情況；動作情節有立體機動裝置帶黎既速度感、經常有人死甚至團滅（Levi 班😭）。但，自問對動漫唔係好大興趣，不了了之下，輕鬆棄劇。
出發黎多倫多之前既某一個假日下午，我細妹睇緊第三季，我無聊得濟同佢一齊睇，果陣對呢度劇既印象提升左少少，但果陣純粹殺時間無認真睇，所以無咩好講。
※
幾日前響TTC 見到有人著住調查兵團嘅自由之翼斗篷，令我有翻睇既念頭。一睇，oh— my— goddess— 除左去快煮個麵之外我無離開過部電腦。睇完正劇再追哂所有番外、劇評、分析。《進擊的巨人》唔係一套熱血動畫，而係一套用熱血黎做包裝既史詩文學！作者諫山 創講故事既能力令我佩服得五體投地：宏大既世界觀、細膩既人物描寫、深過黑洞既伏筆等等等等都係令我著迷既地方。
※
《進擊》一開始以巨人為主題去講爭取自由、再講到人無自由唔係因為天然環境，而係因為其他人既限制、社會體制，再去講到因為生而不同、種族差異、所認知既歷史唔同而發生可悲既衝突等等。一步一步擴大既世界觀表現得乾淨俐落、令人不斷反思。殺死哂巨人就可以得到自由？原來巨人係黎至世界，世界係你地既敵人。殺死哂敵人就可以得到自由，停止戰爭？《進擊》透過人物話：當世界得返一個人既時候，就唔會再有戰爭。
第一季入面角色們處於既牆內，對某啲人殷講係一座「樂園」，更多既係「惡魔既地方」。大家都無錯，只係因為認知既歷史唔同，受既教育唔同而有唔同既立場。歷史話俾馬萊既人知「樂園」入面既都係惡魔，但當亞妮三人組實際入左「樂園」，同「惡魔」相處過後，先知道惡麝們都只不過係普通既人，同佢地一樣有家人、有朋友、會珍惜同伴⋯⋯，就係因為歷史將佢地帶往兩個極端既立場，無可避免地互相殘殺。
※
人物描寫方面，作者亦都創造左各個活生生既角色，我特別中意團長同埋教官既描寫。理性到極點，人人信賴既團長，幾咁完美既一個領導者，原來只係巧合地佢為左目標要做既野同調查兵團要做既事一致。一切都只係因為佢既夢想，佢既私心什至「比人類既存亡」更緊要。教官：先唔講作者將一個伏筆埋左足足三季呢個震撼點，佢明白到自己係平凡人唔會改變到事實——呢一點好貼地，每個人都講夢想每個人都想有一番作為，但世界上有的是普通人，只可以望住其他人實現夢想；每個人都覺得自己係主角，唔知有幾多可以教官咁諗通，承認自己係旁觀者，做好普通人既本份？
最突出既一個必數Levi（原諒我用英文名，天秤座揀唔到應該用邊個中文譯名）兵長，完全零負評（一米六唔算），男女通殺，世界瘋狂。角色既外貌我相信唔係重點，「靚樣」既動漫角色比比皆是；身手方面，強者一般無敵，連心都係硬既，點會有軟弱既一面？《進擊》入面既兵長就係一個非典型強者，或者叫身手非凡既普通人。作者貼上「人類最強」既標籤俾兵長，但又不斷透過唔同既行為去表達兵長另一面既性格：細心溫柔，有責任感、老媽子、嚴重潔癖⋯⋯佢唔會因為自己既身手而自傲，佢會盡力照顧其他人。明明厭惡血（and所有污衊既事物），但當同伴將死，兵長毫不猶豫就捉住同伴染滿血既手安慰佢；當大家見到海好興奮時，只有兵長好似呀媽咁睇住Hange，提醒佢小心有毒；對付女巨人時，兵長班團滅，死剩佢一個，當睇到佢眼神充滿傷痛，但因身處戰場而被逼做理智決定時，你話，點叫人唔心生憐憫？點叫人唔中意！？仲有一點就係，兵長同大家既相處方式好真實，佢無一副高高在上既態度，特別係同Hange分隊長之間既問候永遠離唔開屎尿屁，又一直「抬扛」；當劇中人人都係叫名、尊稱，只有兵長會叫Hange臭四眼（好有愛！），更突顯出兵長唔係專殺巨人既機器。作者比左好多好多細節位兵長，寫都寫唔哂，可以睇下呢篇分析，我覺得講得幾詳盡，好多對兵長既描寫都係睇左之後先明白更多：（簡體字慎入）
https://www.youtube.com/watch?v=ZJcWpYdDZj4&list=LL2x-8_H9bv-z9zOQiqJGiCw&index=5&t=5s
另外兵長既反手持刀技能（用黎話俾你知細節位係做得幾咁好，每重睇一次必有新鮮既發現）：
https://www.youtube.com/watch?v=0AZgOZdonpw
※
提起Hange——哈哈哈哈終於寫到我半夜唔訓都要gut 起身要寫嘅事！！——話說我好少迷CP，睇完第三二季正劇都無咩邊個人物特別中意（翻睇係由第三季睇起），只係感歎作者既創造力量同幻想、沉醉係無論故事人物配樂畫質都係一流既高品質享受。ＢＵＴ！人生最重要的就是這個ＢＵＴ！第一集第九話既一段小情節↓↓
（Hange 同Sasha 撞樣)
其入呢個坑係無意識既，果陣覺得呢兩人一齊既畫面又幾和諧喎（明明女高過男既係現實根本⋯⋯），睇完第一季之後心念念咁google佢地兩人同場既scene，追各站既討論，然後睇到佢地大量既同人圖、文，睇下睇下我就被踢入LeviHange /兵韓/里韓呢坑終極大坑啦！
總括黎講，呢對ＣＰ既特別之處在於佢地既日常互動好排外。Levi 大概對每個人都好臭串，唔係每一個人都應付到，偏偏Henge 唔怕Levi ，仲可以以相同程度反擊。你一句我一句既耍花槍，就算係團體入面都無咩人可以插得上嘴。而且我好中意佢地係劇中唔顯眼既火花，一切一切都化為簡單既日常，唔似Petra對兵長或Jean 對Mikasa 咁明明確確心心眼，佢地有既係對彼此既信任（係戰場上背對背）、歡樂既溝通方式、相同程度既責任（都是兵團長），屬於「如果你三十歲都無人要，我地就一齊啦」既青梅竹馬關係，一冷一熱、互相提點、互補不足，溫馨得很。可能係我老了（廿五算中女了），成人向既ＣＰ比較合我心意，事實上呢對ＣＰ亦都好合乎我一向既戀愛觀——相處舒服、做到朋友、比到信任感先會再考慮發展，可以話係我傾向同朋友指拖而唔係陌生人。
＊希望有一話能表達Hange理解Levi 為何不救Erwin
＊還希望作者可以寫多一點Hange 既往事、軟弱既一面，黑暗面，加強深度；而家既Hange 就好似普通故事中既普通強人一樣，又或是主職負責劇情推進
＃漫畫１０６話ＰＡＧＥ １３＃眼神
＃我比較喜歡漫畫中henge 成熟（？）的中性美
＃漫畫１２６話 ＰＡＧＥ ６＃同居吧
※
我好中意推薦朋友睇The good place 同埋Game of Thrones ，呢兩套都係我心目中既神劇。即使有部分劇情、對白仲有進步空間，但佢地係我心中一直都係一百分滿分既存在。但係，進擊的巨人，我俾一千分。
※
— 經典伏筆：一、Reimer 戰士；二、教官之回憶；三、Eren 父親提到地下室的眼神
— 劇情張力：第二季第六集，一個重大既秘密由Ｒｅｉｍｅｒ口中輕描淡寫咁講出黎果種反差，加上澤野弘之既配樂之於宮崎駿既久石讓配樂，幾分鐘既情節睇到我目瞪口呆。
— 明顯角色既成長：唔再係第一季入面乞人憎既熱血細路。其實佢既目標一直無變、一直都係果個嚮往自由既Eren，經過三季扎扎實實既磨練成就由馬萊篇開始既艾主席！
以上幾點都係想寫既，不過攰了，有機會再補充，祝：不足十話就大結局既《進擊》有一個現實圓滿既結局
——寫於多倫多，剛睇完長篇同人、訓唔著既清晨五時
留言列表
